E ardhmja e Son Heung-min në dyshim: Tottenham i hapur për shitje, klubet saudite dhe Mourinho në pritje
E ardhmja e Son Heung-min te Tottenham Hotspur është vënë në pikëpyetje pas ardhjes së trajnerit të ri, Thomas Frank. Edhe pse sulmuesi korean është ende pjesë e turneut parasezonal të klubit në Azi, drejtuesit e klubit nuk kanë dhënë asnjë garanci për rolin afatgjatë të tij.
Son, 33 vjeç, ka edhe një vit kontratë me Tottenhamin, por klubi është i gatshëm ta shesë nëse vjen një ofertë e përshtatshme. Prania e tij në turneun në Azi, ku Tottenham do të përballet me Arsenalin dhe Newcastle, ka vlerë të madhe komerciale, por pas kuintave, klubi nuk e ka përjashtuar mundësinë e një largimi të tij të afërt.
Burime pranë klubit bëjnë me dije se drejtuesit i kanë komunikuar Sonit se nuk do ta pengojnë nëse vendos të largohet këtë verë. Deri më tani, interes konkret kanë shfaqur disa klube nga Arabia Saudite – përfshirë Al-Ahli, Al-Nassr dhe Al-Qadsiah – ndërsa në horizont qëndrojnë edhe opsione si LAFC në MLS dhe Fenerbahçe i Jose Mourinhos, i cili ka punuar më parë me të.
Tottenham ka filluar tashmë të ndërtojë një ofensivë të re, duke siguruar shërbimet e Mathys Tel dhe Mohammed Kudus, ndërsa është në kërkim edhe të sulmuesve të tjerë. Kjo tregon qartë se Son nuk shihet më si pjesë qendrore e projektit të ri të klubit londinez.
Nëse largimi ndodh, turneu në Azi mund të përfaqësojë përshëndetjen e fundit të një legjende që ka dhënë shumë për Tottenhamin – në fushë dhe jashtë saj.
